Mér er mikið niður fyrir að þurfa að setja þetta hérna inn.

Fyrir ári síðan kom inn á heimilið mitt yndisleg tík sem gengdi nafninu Foxý.  Hún var lítil og sköllótt og mér fannst hún bara fallegust, bræddi mitt litla hjarta alveg frá byrjun.  

Foxý mín er rosalega mikill karakter. Tekur öllum vel, vill tala við alla og helst fara upp í "legið " á öllum sem koma í heimsókn, jafnt körlum sem konum.  Ekki er til neitt sem heitir illska í henni þó hún geti nú alveg svarað fyrir sig þegar kemur að stórum hundum, enda alist upp með tveim slíkum frá því áður en hún varð eins árs.  Hún er ekki hrædd við neitt, mikill könnuður um hluti, dýr og menn og er heimsins besti varðhundur, að hennar mati.

Hún er með viðkvæma húð og hefur alltaf verið.  Þegar hún var ný komin á heimilið var hún nánast eitt blæðandi sár að sökum þurrks í húðinni.  Í dag er hún mjúk og rosa fín lítil tík.  Þessir hundar eru gjarnir á að fá fílapensla og stíflaða hárkirtla undir og á milli þófanna.  Þegar ég hef orðið vör við það hef ég einfaldlega kreist það í burtu og látið svo eiga sig.  Ég set ekki sótthreinsandi, ég notaði græðandi smyrsl þegar hún var yngri en nú í dag nota ég ekkert á hana.
Hef ég reynt að hafa það sem reglu að þvo augun hennar með soðnu vatni einu sinni á dag, eða eins oft og ég get.  Mikið af stírum safnast í augun á henni og er ég mikið að hreinsa það, til þess að minnka það hef ég klippt hárin sem næst eru augunum niður þannig að þau séu ekki í þeim og ertandi þau upp.
Það skiptir ekki máli hvernig hún er, í mínum augum er hún alltaf fallegust.

Karma mín, Great Dane tíkin og Foxý eru mestu mátar og geta legið saman á gólfinu svo tímunum skiptir í bardaga, og þess á milli skríður litla dýrið mitt undir kviðin og nær sér í hita eða leggst ofan á Kerúb sinn.  Hún hugsar vægast sagt vel um stóru systkyni sín, þrífur augun þeirra við hvert tækifæri og kyssir þau og knúsar eins og það sé hennar síðasta.

Foxý hefur aldrei þurft að vera ein.  Hún hefur alltaf haft stóru hlunkana með sér til að passa þau, eða er með mér. 
Og þegar ég lít til baka hefði ég ekki viljað hafa það neitt öðruvísi.

Hún er hraust, búin að fara í sprautur og skoðun eins og þau stóru og er heilbrigð að flestu leyti.  Það eina sem háir henni er einskonar "bakflæði".  Ef að hún borðar eða drekkur með miklum gassa-gangi þá koma hljóð sem að skelfa þá sem aldrei hafa heyrt það áður. Ég hélt að tíkin væri að drepast þegar ég heyrði það fyrst.  En það er ósköp erfitt að lýsa því hér hvernig þau koma, en hún herpist öll saman.  Mitt ráð er að taka hana í fangið og róa hana niður. Það hefur alltaf virkað.  Þetta gerist líka stundum ef hún er mjög spennt, þegar koma gestir eða ef Karma og Kerúb gætu mögulega verið að stinga hana af í eltingarleik.

Hún Foxý mín hefur galla, stóran galla að mörgu leyti, en það er ekkert sem að ég gæti ekki tekið á mig að vissu leyti líka, en þó að hún hafi þennan galla og hafi stundum verið við það að gera mig gráhærða, svo hárlausa að þá er hún þó svo yndisleg að ég hef látið mig hafa það, og myndi sennilegast gera áfram ef aðstæður hefðu ekki breyst svo mikið.
Hún er kúkalabbi og pissudúkka inn í heimahúsum. Hún sækir í baðmottur eða ef það liggja t.d buxur á gólfinu, hún leitar að fleti til þess að gera þarfir sýnar á, og ef hún gerir það inni þá skammast hún sín alveg rosalega.  Ég hef verið hörð við hana og sett hana hreinlega út og haft hana úti með hinum, þá pissar hún, en sjaldnast kemur kúkur, þó stundum.  Ég er að vinna þannig vinnu að ég er farin klukkan 8:15 í vinnuna og er ekki að koma heim fyrr en á bilinu 17:00- 19:00. ég reyni að fara alltaf heim í hádeginu EF að hundarnir eru heima, og ef langir dagar eru þá koma þeir bara með mér annaðhvort að morgni eða í hádeginu og eru með mér.  Ég vinn sem smiður og eru þau bara laus með mér , en auðvitað fer það eftir umhverfinu að hverju sinni. en þau eru aldrei ein heima þennan tíma í heild sinni.  Ég er svo mikill kjúklingur að ég hef það ekki í mér að hafa litla dýrið eina í búri á meðan að ég er í vinnu, og það gefur auga leið að það bíður eftir mér pissupollur og kúkur þegar að ég kem heim.  Ég veit að það er vel hægt að venja hana af þessu, og auðvitað óska ég þess að hún komist á heimili hjá einhverjum sem að er heimavinnandi, eða vinnur þannig að dýrið geti alltaf verið hjá þeim aðila. 
Óskandi væri að það væri annar hundur á heimilinu því að hún þekkir ekki annað og er mikil félagsvera, bæði í menn og dýr. 

Ástæða þess að ég verð að láta hana er sú að ég er fyrst og fremst að hugsa um hennar hag.  Ég er að vinna mikið, er að vinna vinnu þar sem að hún getur ekki verið ein allan daginn, né verið úti allan dagin eins og þau stóru.  Athyglin ósjálfrátt skerðist sem ætti að vera að beinast að henni og hún á ekki skilið annað en að fá alla heimsins athygli frá eiganda sýnum.  Á meðan að hin geta komið með mér í hesthúsið, hlaupið með ef ég fer á vélsleða og verið úti í hvernig veðri sem er , þá er það ekki leggjandi á hana.
Ég er bara að vera raunsæ um hennar hag og ekkert annað. 

Ég er ekki að óska eftir einhverjum sleggjudómum fyrir að taka hana að mér í flýti eða gera mér ekki grein fyrir hlutunum, stundum bara æxlast hlutirnir á þennan hátt og verður það þá bara að vera svo. 

Ég er búin að fá margar fyrirspurnir um hana síðan að ég fékk hana og alltaf neitað.
Ég ætlaði mér að láta þetta ganga, ætlaði mér að eiga hana og elska hana ein en það gekk ekki. 
En ég er mjög skeptísk á það hvert hún fer, til hvernig fjölskyldu og mun vera mjög frek á að vita um fjölskyldu hagi og háttarlag.

Ég vil að hún verði geld. Ég væri búin að því sjálf ef að ég hefði ekki verið með þessi tvö stóru í miklum aðgerðum og búin að punga nokkrum hundrað köllum út fyrir því, maður getur ekki gert allt í einu. 
En þessi tík hefur ekkert með það að gera að vera ógeld.
Ég vil fá að fylgjast með henni og fá að hitta hana.
Ég vil , ef þetta heimili bregst, fá hana strax aftur til mín, ekki á eitthvað flakk af mér óvitandi.

Ég mun nýta mér neitunnarvaldið alveg hiklaust. Og bið ég fólk aðeins að hafa samband ef það hefur virkilegan áhuga og ef það telur sig geta veitt henni það sem að
ég fer fram á. 

Það er hægt að hafa samband við mig á [color=red]sigridurj@gmail.com [/color]
eða hérna.

Með henni fylgja theo-kuldagalli, íþróttagalli sem er góður yfir sumarið, ullarvesti, matarskálar og annað slíkt, sem og heilbrigðisvottorð.

Ég vona að nýjir eigendur vilji vera í sambandi við eigendur systkyna hennar enda frábært fólk og gaman að fylgjast með þessum elskum.

Ég læt þetta gott heita í bili, þarf að þerra lyklaborðið og knúsa dýrin mín. Eins og ég sagði ofar þá er þetta eitthvað sem að ég er búin að fresta eins og ég mögulega get en það er henni fyrir bestu að fá nýtt
heimili.

Kær kveðja Sigga